လပ်ကီးကလေး ဆုံးသွားရှာပြီ

ယခုနှစ် အောက်တိုဘာလ ၇ ရက်နေ့က စာရေးသူ၏အိမ်မှာ ရိုက်ထားသည့်ပုံ။

ဒီကနေ့ညနေ ၃ နာရီခန့်က အလုပ်မှာရှိနေတုန်း အိမ်ရှင်မထံက ဖုန်းဝင်လာခဲ့သည်။

မိမိက ဖုန်းကိုင်လိုက်သောအခါ တစ်ဖက်မှ အိမ်ရှင်မ၏အသံသည် ငိုသံဖြင့် တစ်ဆို့နေပြီး နှုတ်က မည်သည့် စကားမျှ ထွက်၍မလာခဲ့ပေ။ ဘေးမှာရှိနေသည့် သားက သူ့အမေထံမှ ဖုန်းကိုယူပြီး အကျိုးအကြောင်းပြော သဖြင့် လပ်ကီးကလေး ဆုံးသွားပြီဆိုသည်ကို မျှော်လင့်ထားသည့်အတိုင်း ကြားသိလိုက်ရ၏။  

လပ်ကီးဆိုသော ဂျက်ရပ်ဆဲတယ်ရီယာ(Jack Russell Terrier) အမျိုးအစား ခွေးကလေးသည် ရှေးဘ ၀က ရေစက်ကြောင့်ဖြစ်ပါမည်။ မိမိတို့ မိသားစုနှင့် ၁၅ နှစ်ကျော် ၁၆ နှစ်နီးပါး အတူရှိနေခဲ့သည်။ သူ၏ မွေး ဖွားရာဌာနေဖြစ်သော သြစတေးလျနိုင်ငံမှ အသက် ၃ လ သားအရွယ်မှာ စင်ကာပူသို့ရောက်လာခဲ့ပြီး ၈ လ သား အရွယ်တွင် သူ၏ပထမပိုင်ရှင်ထံမှ စာရေးသူတို့အိမ်သို့ ရောက်လာခဲ့တော့၏။ 

သူ့အမည် ‘လပ်ကီး’(Lucky)သည် သူ၏ပထမပိုင်ရှင်ဖြစ်သော စင်ကာပူလူမျိုး လူငယ်လင်မယားက ပေး ထားသည့် အမည်ဖြစ်သည်။ မိမိတို့က ထိုအမည်ကိုပင် နှစ်ခြိုက်သဖြင့် သူ့ကို လပ်ကီးလို့ပင် ဆက်ပြီးခေါ်ခဲ့ ပါသည်။

မိမိတို့အိမ်တွင် သူ အကြာကြီးနေသွားခဲ့ပြီးမှ ယခုတော့ မိမိတို့ထံက သူ အပြီးအပိုင် ထွက်သွားခဲ့ချေပြီ။ 

မခေါ်ပဲနှင့် လာ၊ မနှင်ပဲနှင့် ပြန်သွားခြင်းပေပဲလား။

 

ယခုနှစ် အောက်တိုဘာလ ၇ ရက်နေ့က စာရေးသူ၏အိမ်မှာ ရိုက်ထားသည့်ပုံ။

 

သူ သေသွားသောအခါ မိမိတို့ မိသားတစ်စုလုံး ၀မ်နည်းပူဆွေးဖြစ်ကြရသည်။ အားလုံးထဲမှာ သမီးက စိတ် အထိခိုက်ဆုံး ဖြစ်ရလေသည်။ သူ အိမ်ကို စပြီးရောက်လာကတည်းက သမီးနှင့်အတူ နေခဲ့သည်။ သမီးလေး အိမ်ထောင်ပြုသွားပြီး သူတို့အိမ်နှင့်သူ သီးခြားခွဲနေသောအခါ သူက စာရေးသူတို့အိမ်မှ သမီးနှင့်အတူ အိုး သစ်အိမ်သစ်သို့ ကောက်ကောက်ပါအောင် လိုက်ပါသွားလေသည်။

သို့သော် သမီးတို့၏အိမ်မှာ မိမိတို့အိမ်နှင့် မဝေးလှသဖြင့် သမီးနှင့်လပ်ကီးတို့ လမ်းလျှောက်ရင်း မိမိတို့ထံ မ ကြာမကြာ ရောက်လာတတ်ကြသည်။ လမ်းလျှောက်လာရသည်မှာ အိမ်ထဲ၌ တနေ့လုံး ကုပ်နေရသည့် လပ် ကီးကလေးအား ကိုယ်လက်လှုပ်ရှားလေ့ကျင့်ခန်းရစေလို၍ တစ်ကြောင်း၊ ခွေးကို တက္ကစီတို့ လိုင်းဘတ်စ် ကားတို့ဖြင့် တင်ပြီးခရီးသွားရန် အဆင်မပြေ၍ တစ်ကြောင်း ဖြစ်ရလေသည်။ လပ်ကီးကိုယ်တိုင်ကလည်း အိမ်ထဲမှ အပြင်သို့ထွက်ပြီး လမ်းလျှောက်ရလျှင် ပျော်မဆုံး မော်မဆုံးလေတော့။

စာရေးသူတို့အိမ်ကို ရောက်လာသောအခါ မိမိတို့နှစ်ဦးနှင့်သားတို့အား ပြန်တွေ့ရသဖြင့် သူက ပျော်လေ့ရှိ သည်။ အိမ်မှာ လူစုံတက်စုံမတွေ့ရက ကျန်သောသူများကို သူ့မျက်လုံးလေးများဖြင့် ဝှေ့ရမ်း ရှာတတ်သည်။

တစ်ခါတစ်ရံ သမီးသည် သူတစ်ဦးတည်းဖြစ်စေ သူ့ခင်ပွန်းနှင့်ဖြစ်စေ အပြင်သွားစရာကိစ္စရှိက လပ်ကီးကို စာရေးသူတိုိ့အိမ်သို့ လာပို့ထားတတ်သည်။ ညနေမှာအချိန်တန်၍ သမီး ပြန်ရောက်မလာသေးပါက လပ်ကီး ခမျာ လည်ပင်းတံတောင်ရှည်အောင် မျှော်ရှာပါလေပြီ။ ထိုင်ချလိုက် ထသွားလိုက် ပြန်ထိုင်လိုက်ဖြင့် ဂနာမ ငြိမ်လေတော့။ ပြန်မရောက်တာ ကြာလေ တံခါးအနား သွား သွားကြည့်ကာ သူ့မှာ ဆောက်တည်ရာမရ ဖြစ် ရလေပင်။ သူ့မျက်နှာတွင် သမီးကို စောင့်မျှော်တာထက် စိုးရိမ်သောကဖြစ်လာသည့်လက္ခဏာများ ပေါ်လွင် လာတော့သည်။

အော် .. လပ်ကီးခမျာ လူများကဲ့သို့ မျှော်တတ်သလို ပူလည်းပူတတ်ပါတကား။

မျှော်လည်းမျှော် စိတ်လည်းပူလာရပြီဆိုပါက လပ်ကီးသည် ထသွားထလာ လုံးဝမလုပ်တော့ပဲ တံခါးဝအနား မှာ တံခါးဖက်ကို မျက်နှာတူရူမူလျက် စာရေးသူတို့ဖက်ကို ဖင်ပေးထားကာ အပြီးထိုင်စောင့်နေချေသေးတော့။ သမီး ပြန်ရောက်လာလို့ကတော့ ပူပင်သောကတွေပျောက်ပြီး သူ့ခမျာ ပျော်လိုက်ရသည့်ဖြစ်ခြင်း။ 

သူ့အဖြစ်ကို ဘေးမှကြည့်ကာ မိမိတို့မှာ သနားမိကြပါသည်။  

 

လပ်ကီးလေးက မိသားစုနှင့်အတူ တယ်လီဗီးရှင်းလည်း ကြည့်တတ်သည်။ (သြဂုတ် ၂၀၁၁)

 

၁၃၇၄ ခုနှစ်၊ တန်ဆောင်မုန်းလပြည့်ကျော် ၄ ရက်။ 2 December 2012 (Sunday) တွင် ဆက်ရေးပါသည်။

ပြင်သစ်လူမျိုး စာရေးဆရာကြီး ‘မီလန် ကွန်ဒဲရား’ က -

“ခွေးများသည် ကျွန်တော်တို့အား နိဗ္ဗာန်နှင့် ပေါင်းကူးပေးထားသူများ ဖြစ်ကြသည်။ သူတို့တွင် မကောင်းမှု အကုသိုလ်များ မရှိကြ။ မနာလို ၀န်တိုတတ်သည့် မစ္ဆရိယစိတ်များ မရှိကြ။ မတင်းတိမ် မရောင့်ရဲခြင်းများ မ ရှိကြ။ အလွန်လှပသည့် ညနေခင်းလေးမှာ ခွေးကလေးတစ်ကောင်နှင့်အတူ တောင်ခါးပန်းမှာ ထိုင်နေလိုက်ရ ရင် အေဒင်ဥယျာဉ်ကြီးထဲသို့ ပြန်ရောက်သွားသလို ပျင်းရိငြီးငွေ့ခြင်းကင်းသော ငြိမ်းအေးချမ်းမြေ့ မှုကို ခံစား ရမည်” ဟု ရေးခဲ့ဖူးပါသည်။

ထိုစကားမှန်သည်ဟု မိမိ ယုံကြည်ပါသည်။

လပ်ကီးလေးက မိမိတို့အား -

သန့်စင်သော ချစ်ခြင်းမေတ္တာကို သင်ပြပေးခဲ့ပါသည်။ 

ဂရုဏာထား စာနာတတ်ရန် သင်ပြပေးခဲ့ပါသည်။

သည်းညင်းခံပြီး ကြင်နာ သနားတတ်ရန် သင်ပြပေးခဲ့ပါသည်။ 

သည့်အပြင် သူ ဘ၀၏နောက်ဆုံး လပိုင်း ရက်ပိုင်းများ၌ ‘ဇရာပိ ဒုက္ခာ’၏သဘောကို ပျက် ပျက်ထင်ထင် ပြ သွားခဲ့ပါသေးသည်။ 

‘ဂျက်ရပ်ဆဲတယ်ရီယာ’တို့၏ သက်တမ်းသည် ပျမ်းမျှ အားဖြင့် ၁၂ နှစ်မှ ၁၅ နှစ်အထိသာ ရှိတတ်ကြလေရာ လပ်ကီးသည် မိမိတို့ အပြုစုကောင်းသဖြင့် သူ့ဘ၀ကို ၁၆ နှစ်ကျော်ခန့် နေသွားခဲ့သဖြင့် ဇရာ၏လက္ခဏာများ ကို ကြုံတွေ့ရင်ဆိုင် ခံစားသွားရလေသည်။

လွန်ခဲ့သည့် ၃ နှစ်လောက်က သူ၏ သွားများကြဲလာပြီး နား တွဲ့လာခဲ့သည်။ လွန်ခဲ့သည့် ၁ နှစ်ခွဲလောက်ကမူ သူ၏မျက်စေ့အမြင်စွမ်းအားကျဆင်းလာခဲ့သည်။ ယခုနှစ်လည်ပိုင်းမှစပြီး ကြွက်သားများ အားအင်ဆုတ်ယုတ် မှု သိသိသာသာကြီး ရှိလာခဲ့သည်။ သူ ခုန်တက်နေကြဖြစ်သည့် ဧည့်ခန်းက ဆိုဖာအပေါ်သို့ ယခင်ကလို စွေ့ ကနဲ မခုန်တက်နိုင်လေတော့။ လှေကားကိုလည်း ယခင်ကလို သူ့ဖာသာ မတက်နိုင်တော့သဖြင့် ချီတင်ပေးရ သည်။ လှေခါးကို သူ့ဖာသာ ဆင်းနိုင်သေးသည်ဟု ဆိုနိုင်သော်လည်း အမှန်တကယ်မူ အိနြေ္ဒရရလေး မဆင်း နိုင်လေတော့။ မြေဆွဲအား၏ဆွဲချမှုကြောင့် သူ့ကိုယ်ကို မထိန်းနိုင်ရှာပဲ လှေကားထစ်များပေါ်က ဒရောသော ပါး လှိမ့်ပြေးဆင်းသဖြင့် သူ့အဖြစ်ကိုကြည့်ကာ မိမိတို့က သနားလည်းသနား ရယ်လည်းရယ်မိကြသေး၏။ 

မဆုံးခင် ၂ ပတ်ကျော်လောက်က ဖျာပေါ်မှာဝပ်ရင်း မှိန်းနေခဲ့သည့် လပ်ကီးလေး။ (နိုဝင်ဘာ ၁၁ ရက်၊ ၂၀၁၂)

ရယ်မိသာ ရယ်မိကြသည်။ တကယ်မှာ သူ့အဖြစ်က သနားဖို့ ပိုလို့ကောင်းပါလေ၏။ ဇရာက တနေ့တခြား ဖိ စီးလာသဖြင့် အားမတန်၍ မာန်လျှော့ရရှာသည့်အဖြစ်။ တကယ်တမ်း မလုပ်နိုင် မကိုင်နိုင်ဖြစ်လာသောအခါ ဘာများ တတ်နိုင်ပါဦးမည်နည်း။

ပြီးခဲ့သောနှစ်က လပ်ကီး ကျန်းမာရေးမကောင်းသဖြင့် သူ့တစ်သက်မှာ ပထမဆုံးအကြိမ် ဆေးခန်းသို့ သွား လိုက်ရသည်။ ဘာရယ်လို့တော့မဟုတ်၊ မိုးဆက်တိုက်အေးသောကြောင့် ချောင်းကလေး တဟွတ်ဟွတ်ဖြစ်၍ သမီးက သွားပြပေးခြင်းဖြစ်သည်။ ယခင်ကမူ တစ်ကြိမ်တစ်ခါမှ ဆေးခန်းသို့ မပြခဲ့ဘူးပါချေ။ ဆရာဝန်မက အဆုတ်နှင့်နှစ်လုံးတို့ကို ဓာတ်မှန်ရိုက် စစ်ဆေးသည်။ ဆီးနှင့်သွေး စစ်သည်။ 

အဆုတ်ထဲ ရေ၀င်ခြင်းနှင့် နှလုံးကြီးခြင်း စသည့်အဖြေ ၂ ခု ရခဲ့သည်။ တစ်ခြား ဘာဆိုဘာမှ မဖြစ်ဟု ဆရာ ၀န်မက ပြောပါသည်။ လပ်ကီးသောက်ရန် ဆေးများပေးလိုက်၏။

နောက်တစ်ခု ဆရာဝန်မက မှာလိုက်သေးသည်မှာ လပ်ကီးသည် သက်တမ်းပြည့်နေပြီဖြစ်သ ဖြင့် သူ၏လက် ရှိနှလုံးကျန်းမာရေးအရ နောက်ထပ် ၃ လ သို့မဟုတ် အများဆုံး ၆ လ ခန့်သာ နေရတော့မည်ဟူ၍ ဖြစ်လေ သည်။    

သို့တစေ လပ်ကီးကလေးက သေမင်းကို အံတုလျက် နောက်ထပ် တစ်နှစ်ကျော်ခန့် နေသွားလေသည်။ 

ဆုံးမည့်နေ့ မနက်ကလည်း သမီးနှင့်လပ်ကီးတို့  အခါတိုင်းလိုပင် လမ်းထွက်လျှောက်ကြသေး၏။ သို့သော် လပ်ကီးခမျာ လမ်းကောင်းကောင်း မလျှောက်နိုင်တော့ပါချေ။ နည်းနည်းလေးလျှောက်ပြီးတိုင်း အကြာကြီး နားလေသည်။ နားနေရင်းဖြင့် သမီးကို တွေတွေလေးမော့ကြည့်ရှာသည်။ “လပ်ကီး လျှောက် .. လျှောက်” ဆိုတော့ သူက ထုံးစံအတိုင်း ဖင်ကလေး လှုပ်တုပ်လှုပ်တုပ်ဖြင့် ဖြည်းဖြည်းလေး ဆက်လျှောက်ပြန်ပါသည် တဲ့။  

သို့နှင့် အိမ်သို့ပြန်လာခဲ့ကြ၏။

ခဏနားပြီးသောအခါ သမီးက လပ်ကီးလေးကို ရေမိုးချိုး ကိုယ်လက်သန့်စင်ပေးပါသည်။ ရေချိုးပြီးနောက် တဘက်ဖြင့် ပွတ်တိုက်ပေးကာ ဆံပင်ခြောက်စက်ဖြင့် မှုတ်ပေးလေသည်။ အားလုံးပြီးသည်နှင့် လပ်ကီးက အနားမယူသေးပဲ ဧည့်ခန်းထဲ၌ တလှုပ်တုပ်တုပ်ဖြင့် လမ်းလျှောက်နေပြန်ပါသည်။ ဒီအခါမှာ သမီးက ထူးခြား ချက်တစ်ချက်ကို သတိပြုမိ၏။ 

လမ်းနည်းနည်းလျှောက်လို့ပြီးတိုင်း လပ်ကီးက သူ့ခေါင်းလေးကိုမော့ လျက် လေရှူသွင်းလေသည်။ လေရှူ မ၀ ဖြစ်နေပုံရသည်။ 

 

လပ်ကီး၏ အရိုးပြာအိုး (အသက် ၁၆ နှစ် ၁ လ)။

 

၁၃၇၄ ခုနှစ်၊ တန်ဆောင်မုန်းလပြည့်ကျော် ၇ ရက်။ 5 December 2012(Wednesday) တွင်ဆက်ရေးပါသည်။

နေ့ခင်း ၁ နာရီလောက်တွင် လပ်ကီး၏လျှာမှာ ပြာညစ်ညစ်ဖြစ်ပြီး ပါးစပ်ကလည်း သွားရည်များ ကျနေသည် ကို တွေ့ရသဖြင့် သမီးသည် အတော်ကြီးစိတ်ပူသွားလျက် မိခင်ဖြစ်သူအား တယ်လီဖုန်းဖြင့်ဆက်ပြီး အထိပ် တလန့် ငိုယိုအကြောင်းကြားလေသည်။ အမေဖြစ်သူနှင့်သားတို့က သမီးထံ တက္ကစီနှင့် ကတိုက်ကရိုက်သွား ကြရသည်။ သမီးတို့အိမ်တံခါးဝရောက်သော အခါ အမေနှင့်သားတို့ကို တွေ့ရသဖြင့် လပ်ကီးကလေး က နေ မကောင်းနေသည့်ကြားမှ ၀မ်းသာအားရ ထွက်ကြိုရှာပါသေးသည်။  

ဧည့်ခန်းရှိ ၂ ယောက်ထိုင်ဆိုဖာ၌ အမေကြီးထိုင်ချလိုက်ရာ လပ်ကီးက အမေကြီး၏ခြေထောက်အနားသို့ လာ ရပ်ရင်း အမေကြီးကို မော့ပြီးကြည့်နေဆဲ ရုတ်တရက် လဲကျသွားပြီး ပြန်မထနိုင်တော့ပေ။ ဘေးတိုက်ကလေး လှဲနေရင်း အသက်ရှူပြင်းလာကာ ပါးစပ်ကလည်း အရည်များကျလာသဖြင့် အမေကြီးက သမီးထံမှတဘက် တထည်တောင်းပြီး ခေါင်းအောက်တွင် ခံထားပေး၏။

အသက်ပြင်းပြင်းရှူရင်း မြင့်တက်လိုက် ပြန်ကျသွားလိုက်ဖြစ်နေသော လပ်ကီး၏ရင်ပတ်ပေါ်၌ သားက သူ့ လက်ဖ၀ါးကို ညင်သာစွာ ပြန့်ပြန့်လေးတင်ထားလျက် “လပ်ကီး စိတ်အေးအေးထား.. စိတ်သက်တောင့်သက် သာရှိအောင်နေပါ” (Relax .. relax..)ဟု အားပေးနှစ်သိမ့်စကား ပြောပေးနေသည်။ အမေကြီးသည် လပ် ကီး နောက်ဆုံးအချိန်သို့ ရောက်နေပြီဖြစ်မှန်း သတိပြုမိသဖြင့် ဘုရားစာများ ရွတ်ပေးရင်း “လပ်ကီး သွားစ ရာရှိတာကို စိတ်အေးလက်အေးထားပြီး သွားပါကွယ်။ ဘာကိုမှ နောက်ဆံတင်းမနေနဲ့နော်..”ဟု မှာနေ၏။

သမီးကမူ ခြေမကိုင်မိ လက်မကိုင်မိဖြစ်ပြီး ငိုယိုလျက် Jalan Jurong Kechil အရပ်ရှိ Vet Practice Pet Ltd ဆေးခန်းသို့ ဖုန်းဆက်ကာ လပ်ကီး၏အခြေအနေကိုပြောပြပြီး ယခုနေ့ခင်းအချိန်တွင် အရေးပေါ် လာလိုကြောင်းမေးသောအခါ တိရ္ဆစာန်ဆေးကုခန်းမှ နေ့ခင်းထမင်းစားချိန်ဖြစ်သော်လည်း “လာသာလာ ခဲ့ပါ” ဟု ပြောရှာပါသည်။

“လပ်ကီး သေတော့မှာလား အမေ”ဟုမေးရင်း သမီး၏ငိုသံကြီးက ပို၍ကျယ်သွားရာ လပ်ကီးက ကြားလိုက်မိ မည် ထင်ရပါသည်။ သူ့အမ ငိုနေသဖြင့် သားက "အမ ငိုမနေနဲ့။ လပ်ကီးကို စိတ်အေးအေးထားပြီး သွားတော့ လို့ လာပြော။' ဟု ပြောသဖြင့် သမီးက လပ်ကီးအနားကို တိုးသွားလျက် ပြောလိုက်သောအခါ လပ်ကီးလေး က သိသဖြင့်ဖြစ်ပါမည် နောက်ဆုံးအသံတစ်ချက် ပြင်းပြင်းပြုပြီး ငြိမ်ကျသွားတော့သည်။

အမေကြီး သမီးနှင့်သားတို့က လပ်ကီး ဘ၀တစ်ပါးသို့ စိတ်ချလက်ချကြီး ကူးသွားပြီးဖြစ်ကြောင်း သိလိုက်ကြ သည်။