"ဘလော့လုပ်ပြီး စာတွေ ရေးစမ်းပါဗျာလို့" တိုက်တွန်းသူတွေက တိုက်တွန်း ခဲ့ကြတာ ကြာခဲ့ပါပြီ။ တိုက်တွန်းကြတဲ့ အရင်းနှီးဆုံးမိတ်ဆွေများထဲက တစ်ဦးကတော့ အမေရိကန်မှာရောက်နေတဲ့ ဒေါက်တာသောင်းတင် (စာရေးဆရာ လူမျိုးနော်)ပါ။ ဇနီးဖြစ်သူက အနီးကပ် အားပေးတိုက်တွန်းခဲ့ သလို သမီးဖြစ်သူကတော့ ယခုဘလော့ကို အစမှအဆုံး လုပ်ပေးခဲ့တာ ဖြစ် တယ်။ ရေးမယ် ရေးမယ်နဲ့ အခုမှပဲ ရေးဖြစ်ပါတော့တယ်။ ကမ္ဘာမှာ အရည် အသွေး အကောင်းဆုံးကျွန်းထွက်ရှိတဲ့ အမိမြန်မာပြည်နဲ့ ကျွန်းပင်တွေ ၀န်း ရံထားလေ့ရှိခဲ့တဲ့ မွေးဇာတိ ကန့်ဘလူမြို့ကို အမှတ်တရ ဂုဏ်ပြု့လျက် ဒီဘလော့၏အမည်ကို 'ကျွန်းသာယာ'လို့ ပေးလိုက်ပါသည်။
Saturday, March 28, 2020
စင်ကာပူနိုင်ငံမှ ကိုရိုနာဗိုင်းရပ်စ်ကူးစက်ရောဂါဆိုင်ရာ ဆက်နွယ်သတင်းများ (၂)
လူချင်းချဲ လူစုခွဲစနစ် ကျင့်သုံးပြီ
"လူချင်းချဲ လူစုခွဲစနစ်"ကို နောက်လ ဧပြီလကုန်အထိကျင့်သုံးမည်။ လိုအပ်က ရက်ထပ်တိုးဦးမည်။
ယခုအပတ် ဗုဒ္ဓဟူးနေ့က သား အလုပ်မှပြန်လာသောအခါ "မနက်ဖန်ကစပြီး အိမ်ကနေပဲ အလုပ်တွေလုပ်ရတော့မယ်။ အလုပ်ကိုသွားစရာမလိုတော့ဘူး" ဟု ခရီးရောက်မဆိုက် ပြောပါသည်။
မိမိ၏သားမက်ဖြစ်သူမှာ လွန်ခဲ့သောလကတည်းကပင် တစ်ပတ်ကို ၃ ရက်အိမ်မှအလုပ်လုပ်ပေးရပြီး ကျန် ၂ ရက်ကို အလုပ်မှာသွားလုပ်ရသည်။
သူတို့၏ကုမ္ပဏီတွင်ရှိသောဝန်ထမ်းများကို အုပ်စု ၂ ဖွဲ့ ခွဲထားပြီး အိမ်နှင့်အလုပ် တစ်လှည့်စီပြောင်းကာ အလုပ်လုပ်နေကြရသည်။
ယင်းမှာ လုပ်ငန်းခွင်တွင် ၀န်ထမ်းအချင်းချင်းထိတွေ့ ဆက်ဆံကြရင်း ကိုရိုနာဗိုင်းရပ်စ်ကူးစက်မှုအလွယ်တကူမပျံ့ နိုင်စေရန် စင်ကာပူအစိုးရက လမ်းညွှန်အကြံပေးထားခြင်းဖြစ်သည်။
အလားတူပင် မိမိ အလုပ်လုပ်နေသောဆေးရုံရှိ အကြောအဆစ်ကုဌာနကိုလည်း အဖွဲ့ လေး ၂ ဖွဲ့ ခွဲထုတ်လျက် အလုပ်ဌာန ၂ နေရာထားပြီး အလုပ်လုပ်ကြရပါသည်။
ယခင်ကလို ၀န်ထမ်းအားလုံး ရုံးခန်းတစ်ခုတည်းမှာ အတူနေပြီး အလုပ်မလုပ်ကြရတော့ပေ။
ပိုပြီးဆိုးသည်မှာ တစ်ဖွဲ့ နှင့်တစ်ဖွဲ့ မတွေ့ ကြရခြင်းဖြစ်သည်။
အကယ်၍ အရေးကြီးသောအကြာင်းတစ်ခုခုကြောင့် တစ်ဦးနှင့်တစ်ဦးတွေ့ ဆုံရန်လိုအပ်ပါက နှစ်ဦးလုံး နှာ ခေါင်းစည်းများတပ်ကာ တခဏလေးတွေ့ နိုင်လေသည်။
မိမိကမူ မည်သည့်အဖွဲ့ တွင်မှ မပါဝင်ရဘဲ ကံကွက်ကျားလျက် အထူးလူနာကုဌာန (Block) သို့ တစ်ဦးတည်း ရောက်သွားခဲ့သည်။ ယင်းလူနာကုဌာနတွင် လူနာဆောင်(Ward) ၄ ဆောင်ရှိပါသည်။
စင်ကာပူနိုင်ငံ၏ရောဂါဖြစ်ပွားတုံ့ပြန်မှုအခြေအနေ (DORSCON) အား အ၀ါရောင်အဆင့်မှ လိမ်မော်ရောင်အဆင့်သို့ မြှင့်တင်လိုက်ချိန်ကစပြီး အထူးလူနာကုဌာန၏လုပ်ငန်းများကို အစီအစဉ်အသစ်တစ်ရပ်ဖြင့် စတင်အသက်ဝင်လှုပ်ရှားလာခဲ့ခြင်းဖြစ်သည်။
ဆေးရုံတစ်ခုလုံးရှိလူနာဆောင် ၄၀ ကျော်တို့မှ အဆုတ်ရောဂါဆိုးဝါးစွာခံစားကြရသူများကို ဤအထူးကုလူနာဆောင်များသို့ ပို့ဆောင်လျက် ကုသပေးနေသည်။
ယင်းအထူးကုဌာနတွင်တာဝန်ကျနေသော အထူးကုသမားတော်ကြီးအပါအ၀င် အတိုင်ပင်ခံဆရာဝန်ကြီးများ၊ လက်ထောက်ဆရာဝန်များ၊ သူနာပြုဆရာဆရာမကြီးများ၊ အကြောအဆစ်ကုပညာရှင်နှင့် အကြောအဆစ်လက်ထောက်အားလုံးတို့ ဆေးရုံ၏မည်သည့်နေရာကိုမှ မသွားလာရပါချေ။
မနက်မှာ ဆေးရုံကအထူးလူနာကုဌာနကိုတိုက်ရိုက်သွားရသည်။
ညနေအလုပ်ပြီးသောအခါ ဆေးရုံအတွင်း မည်သည့်နေရာကိုမှ မသွားရဘဲ အိမ်ကိုတန်းပြန်ရသည်။
တစ်နေ့လုံး အထူးကုဌာနအတွင်းမှာ အားလုံးနေနေကြရသည်။
အလုပ်လုပ်ချိန်မှာ လူနာဆောင်တွေမှာ အလုပ်လုပ်ကြ။
နေ့လည်ထမင်းစားချိန်မှာ ထမင်းအတူစားကြ။
သို့အတွက် နေ့လည်ထမင်းကို အပြင်စားသောက်ဆိုင်များ(ဆေးရုံဆိုင်မဟုတ်)က နေ့စဉ် မှာဝယ်ကျွေးသည်။
ပြီးတော့ နေ့ခင်းနားချိန်မှာ မိမိသည် အထူးကုသမားတော်ကြီး၊ အတိုင်ပင်ခံဆရာဝန်ကြီးများ၊ လက်ထောက်ဆရာဝန်များနှင့်အတူ အစည်းဝေးခန်းမ (conference/meeting room) တွင် အတူနားကြရသည်။
စားစရာ မုန့်များ၊ သစ်သီးများနှင့် သောက်စရာ လက်ဘက်ရည်။ ကော်ဖီ၊ အအေးများ ပြည့်ပြည့်စုံစုံထားပေးသည်။
ဆက်ရေးပါဦးမည်။
Subscribe to:
Post Comments (Atom)
No comments:
Post a Comment