ယခုလ ၇ ရက် စနေနေ့က “မျက်ရည်တစ်ပေါက်” ဆိုတဲ့ခေါင်းစဉ်လေးနဲ့ ထောင်ဗူးဝမှာ စိုးရိမ်ပူပန်ကြီး စွာဖြင့် မျှော်လင့်စောင့်စားနေသည့် အမေအိုတစ်ဦး၏ခိုကိုးရာမဲ့ခြင်း၊ မရေမရာ မသေမချာဖြစ်ရခြင်းနှင့် ၀မ်းနည်းကြေကွဲခြင်းတို့ကို လေးစားစာနာစွာ မျှယူခံစားလျက် သတင်းဓါတ်ပုံနှင့်အတူ ကျွန်းသာယာမှာ ရေးသားခဲ့ပါတယ်။
အဲဒီနေ့က အဲဒီစာရေးနေတဲ့အချိန်အထိ မြန်မာလူထုကြီးကမျှော်လင့်နေတဲ့ ကိုမင်းကိုနိုင်တို့ ဦးခွန်ထွန်း ဦးတို့ ကိုကိုကြီးအစရှိတဲ့ ထင်ရှားတဲ့နိုင်ငံရေးအကျဉ်းသားတွေကို မလွှတ်ပေးသေးပါဘူး။ သူတို့ကို အခု လောက်မြန်မြန်ဆန်ဆန်ကြီး လွှတ်ပေးမယ်မလွှတ်ပေးဘူးဆိုတာ လုံးဝမသိရသေးလို့ အားလုံးကမကျေ မနပ်နဲ့ စနိုးစနောင့်ဖြစ်နေခဲ့ကြရတယ်။
ဒါ့ကြောင့် မိမိတို့၏ရဲရင့် စွဲမြဲတဲ့ယုံကြည်ချက်ကြောင့် အကျဉ်းကျခံနေရသူများရဲ့ မိဖဘိုးဘွား မောင်နှမ များ၊ ဆွေမျိုးများ၊ မိတ်ဆွေများနှင့် မိသားစုများစွာတို့အနေဖြင့် သူတို့အားလုံးအတွက် ခါးသည်းစွာကြုံ တွေ့ရင်ဆိုင်နေကြရတဲ့ ရင်နင့်ဖွယ်ရာအဖြစ်တွေကို သတိတရရှိပြီးမမေ့ကြစေဖို့ရည်ရွယ်ပြီး ရေးလိုက် တာပါ။
တကယ်က သူတို့အားလုံး၏ ရင်ထဲကအပူမီးတွေ ဆက်လက်တာမရှည်တော့ပဲ နေထိနှင်းသို့ အလား ကွယ်ပျောက်ငြိမ်းအေးချိန်တန်နေပါပြီ။
ကြာလည်း ရှည်ကြာလွန်းခဲ့လှပါပြီ။
သူတို့အားလုံး အပူရုပ်များချုပ်ငြိမ်းကြကာ ထာဝရပျော်ရွှင်ငြိမ်းချမ်းမှုကို အလျင်အမြန်ဆုံးရရှိစေချင် တာဟာ “မျက်ရည်တစ်ပေါက်”၏ အပြင်းပြဆုံးအန္တိမဆန္ဒပါ။
ဒါနဲ့ပတ်သက်လို့ RFA က AFP မှသတင်းတစ်ပုဒ်အားဖော်ပြခဲ့တာကို အောက်တွင်ကောက်နုတ်ဖော်ပြ လိုက်ပါတယ်။
ကဲ အခုတော့၊ သူတို့အားလုံး လွတ်လာခဲ့ကြပြီ။ အားလုံး အားရလှိုက်လှဲစွာ ၀မ်းမြောက်ဝမ်းသာဖြစ်ကြ ရပြီ။
တဒင်္ဂပဲဖြစ်ဖြစ် ထာဝရပဲဖြစ်ဖြစ် အဲဒီဆန္ဒပြည့်ဝခဲ့ရပေပြီ။
ဖတ်ကြည့်လိုက်ကြစမ်းပါ… EMG မှာဖတ်လိုက်မိတဲ့ ဆရာကြီးလူထုစိန်းဝင်းရဲ့ ဝမ်းသာအယ်လဲစကား များကို။
///‘အခုလို ကိုကိုကြီးတို့လို၊ မင်းကိုနိုင်တို့လို နိုင်ငံရေးအကျဉ်းသားတွေ လွှတ်ပေးလိုက်တဲ့အတွက် အင် မတန်ကိုပဲ ၀မ်းသာပါတယ်။ ဒီဝမ်းသာမှုမျိုးက ကမ္ဘာပေါ်မှာ ဘယ်လူမျိုးမှကို ကြုံဖူးလိမ့်မယ်လို့ မထင် ဘူး။ ဘာကြောင့်လဲဆိုတော့ ထောင်တွေရှေ့မှာ လူတွေ ထောင်နဲ့ချီပြီး ပျော်ရွှင်မြူးတူးနေကြတဲ့ အတွေ့ အကြုံမျိုးက ကမ္ဘာပေါ်က ဘယ်နိုင်ငံမှ ရှိဖူးမှာမဟုတ်ဘူး။ မြန်မာတစ်နိုင်ငံပဲ ရှိလိမ့်မယ်။ ဘယ်လိုမှကို ပြောမပြတတ်တဲ့ ၀မ်းသာမှုမျိုးတွေ ၀မ်းသာတယ်။ နောက်ထပ် ၀မ်းသာစရာတစ်ခု လိုပါသေးတယ်။ တောင်ပေါ်ဒေသတွေက တိုက်ပွဲသံတွေ လုံးဝရပ်စဲပြီးတော့ တစ်တိုင်းပြည်လုံး ငြိမ်းချမ်းတဲ့ အဖြစ်ကို အမြန်ဆုံးရမယ်ဆိုရင်တော့ အခုထက် အဆပေါင်းများစွာ ပိုပြီးဝမ်းသာမိမှာပါပဲ။ အဲဒါလေးကိုလည်း ဆရာ မသေခင်မှာ မြင်တွေ့သွားချင်ပါတယ်’ ///EMG မှာပဲ နောက်တစ်ဦးဖြစ်တဲ့ freedomfighter ကလည်း အခုလိုပွင့်ပွင့်လင်းလင်းနဲ့ အားပါးတရကြီး မှတ်ချက်ပေး(comment)ရေးခဲ့တာကို သတိပြုဖတ်မိလိုက်ပါသေးတယ်။
/// #22 2012-01-16 09:44
ကျွန်တော် အရမ်းပျော်ပြီး အရမ်းကျေးဇူးတင်ပါတယ် သမ္မတကြီးခင်ဗျာ။
တိုင်းပြည်အနာဂတ်မှာ ဒီလို အားပါတဲ့ အပျော်မျိုးတွေ ထပ်လာစမ်းပါစေ။ ရင်နှစ်ချမ်း ဗျမ်းဗျမ်းကွဲအောင် ကျွန်တော်ပျော်လိုက်မယ်။ ///
No comments:
Post a Comment