ပြီးခဲ့တဲ့အမှတ် (၁) မှာတုန်းက ဧပြီလ ၇ ရက်နေ့ကစပြီး စင်ကာပူနိုင်ငံမှာ 'စားကစ်ဘရိတ်ကာ' (circuit breaker) လို့ခေါ်တဲ့ တင်းကျပ်တဲ့ ခပ်ခွာခွာနေထိုင်ရေးမူ(safe distancing measures) ကို ၂လကြာ ချမှတ်ခဲ့တဲ့အကြောင်း၊
ဒါကြောင့် မိမိတို့တတွေဟာ လက်ဘက်ရည်ဆိုင်အပါအ၀င် စားသောက်ဆိုင်တွေမှာ အစားအစာများကို ပုံမှန်လို ထိုင်စားလို့မရတော့ကြောင်း၊
ဒါပေမယ့် 'စားကစ်ဘရိတ်ကာအလွန်'(post-circuit breaker) ပထမကာလ (Phase One) အပြီးဖြစ်တဲ့ ဇွန်လ ၁၉ ရက်နေ့ကစပြီး ဆိုင်တွေမှာ မိမိတို့ ထိုင်စားလို့ရလာကြောင်း ရေးခဲ့ပါတယ်။
ဒါကြောင့် အဲဒီဇွန်လ ၁၉ ရက်နေ့နေ့ခင်းက ဆေးရုံအလုပ်ပြီးတော့ အိမ်ရှင်မကို ဖုန်းဆက်လိုက်ပါတယ်။
ဒီကနေ့ကစပြီး ဆိုင်တွေမှာ ထိုင်စားလို့ရပြီဖြစ်လို့ အခါတိုင်း မိမိတို့စားနေကျ ကော့(စ)ဝေးပွိုင့်ကုန်တိုက်ကြီးက ကေအက်(ဖ)စီဆိုင်မှာ အတူစားကြဖို့လှမ်းခေါ်တာပါ။
ဒါပေမယ့် အဲဒီနေ့က အ်ိမ်ရှင်မက ချောင်းနဲနဲဆိုးနေတာကြောင့် မလာနိုင်လို့ မိမိတစ်ယောက်ထဲပဲစားဖြစ်ခဲ့ပါတယ်။
အဲ .. ဒီကနေ့မနက်မှာတော့ မိမိတို့အဖိုးကြီးအဖွားကြီး ၂ ယောက် ရပ်ကွက်ကဈေးကိုသွားပြီး ဆိုင်ထဲမှာ ပထမဆုံးအကြိမ် အတူထိုင်ပြီး နံနက်စာစားဖြစ်ခဲ့ပါတယ်။
ယခင်က တစ်ပတ်တစ်ခါ နံနက်တိုင်း လာလာစားနေကျဖြစ်တဲ့ ဒီဈေးက စားသောက်ဆိုင်ကို ၂ လကျော်ကြ လာမစားနိုင်ပဲစောင့်ထိန်းခဲ့ရသော ခပ်ခွာခွာနေထိုင်ရေးဥပုသ်ကြီးကို အောင်မြင်စွာ ချိုးဖောက်နိုင်ခဲ့ကြောင်း ပါ။
ဝမ်းသာရပါ၏။
No comments:
Post a Comment