စင်ကာပူမှာ အခမဲ့ဝေတဲ့နေ့စဉ်သတင်းစာ

မိမိအလုပ်သွားတဲ့မနက်တိုင်း ၀ု(ဒ)လဲန်း(စ) ဘူတာ (Woodlands MRT) မှာ အခမဲ့ဝေတဲ့သတင်းစာ ကို ယူလေ့ရှိပါတယ်။ 

အမည်က ‘the new paper’ ပါ။ 

တနင်္လာ အင်္ဂါ အစရှိတဲ့ရုံးဖွင့်ရက်အစပိုင်းမှာ စာမျက်နှာ ၂၀ ကျော်လောက်ရှိတတ်ပြီး နောက်ပိုင်းရက် တွေမှာ စာမျက်နှာ ၃၀ ကျော်အထိများလာပါတယ်။ ရုံးဖွင့်ရက်နောက်ဆုံးနေ့ဖြစ်တဲ့ သောကြာနေ့မှာ တော့ စာမျာက်နှာ ၅၀ ကျော် ၆၀ အထိရှိလာပါတယ်။

ခါးအမြင့်ကျော်ကျော်လောက်ထပ်ပြီးပုံထားတဲ့သတင်းစာတွေကို ဖြတ်သွားဖြတ်လာခရီးသွားတွေက အခမဲ့ကမ်းပေးသူဆီက လှမ်းယူကြကြတာပါ။ 

ပုံမှန်အားဖြင့် မနက် ၇ နာရီဆိုရင် စပြီးဝေလေ့ရှိပါတယ်။  

တစ်နာရီမကြာလောက်ဘူးထင်ပါတယ်။

သတင်းစာပုံကြီးကုန်သွားလေ့ရှိပါတယ်။

အဲဒီနေ့အဖို့ မရနိုင်တော့ဘူးပေါ့။

ဟိုတုန်းကအလုပ်လုပ်နေတော့ ခရီးသွားနေရတာဖြစ်လို့ အခမဲ့ဝေတဲ့သတင်းစာ ၁ စောင်နဲ့ ပြား ၇၀ ပေးပြီးဝယ်ဖတ်ရတဲ့သတင်းစာ ၁ စောင်တို့ကို မီးရထားဘူတာတွေမှာ ကြုံရင်ကြုံသလို ဖတ်ဖြစ်ခဲ့ပါတယ်။ 

                     တစ်ခါတုန်းက အခမဲ့ရတဲ့ 'My Paper’ နဲ့ ၀ယ်ဖတ်ခဲ့ရတဲ့ ‘the new paper’

တစ်ခုက အင်္ဂလိပ်လိုပဲထုတ်တဲ့ ‘the new paper’ ဖြစ်ပြီး နောက်တစ်စောင်က အင်္ဂလိပ်-တရုတ် နှစ်ဘာသာတွဲထုတ်တဲ့ ‘My Paper’ ဖြစ်ပါတယ်။

‘the new paper’ က အတော်လေးထူပြီး ဖတ်စရာအလွန်စုံပါတယ်။ 

မိမိအိမ်မှာ လပေးနဲ့ဝယ်ဖတ်နေတဲ့ The Straits Times သတင်းစာနဲ့ အရွယ်အစားကော အပြင်အဆင်ပါ မတူတဲ့အပြင် သတင်းရေးသားပုံရေးသားနည်းတွေပါ မတူကြတာတွေ့ရပါတယ်။ 

ဟိုအရင် မ ဆ လ (မြန်မာ့ဆိုရှယ်လစ်လမ်းစဉ်ပါတီ) ခေတ်က အရွယ်ကြီးတဲ့ 'လုပ်သားပြည်သူ့နေ့စဉ်' သတင်းစာနဲ့ 'ကြေးမုံ'သတင်းစာတို့အတိုင်းပဲလို့ပြောနိုင်ပါတယ်။

စောစောကပြောတဲ့ ‘the new paper’ နဲ့ ‘My Paper’ သတင်းစာ ၂ စောင်ကို ရထားထဲမှထိုင်ရင်းဖတ်တဲ့အခါဖတ်သလို တစ်ခါတရံမှာ အိမ်ကိုရောက်မှဖတ်ဖြစ်တာမျိုးလဲရှိပါတယ်။

အခုဖတ်နေရတဲ့ ‘the new paper’ ဟာ အရင်ပုံစံဖြစ်တဲ့ ‘the new paper’နဲ့ ‘My Paper’ သတင်းစာ ၂ စောင်ကို ပူးပေါင်းပြီး ၂၀၁၆ ခုနှစ် ဒီဇင်ဘာလက ဘရဲန်းအသွင်အသစ် (a brand new look) နဲ့ တစ် စောင်ထဲပြောင်းထုတ်ထားတာရယ်ပါ။

ဆက်ပြီးရေးဦးမှာပါ။