အညာဒေသ မြို့နယ်လေးတစ်ခုအတွင်းရှိ ကျောင်းဘောလုံးအသင်းများ အချင်းချင်းယှဉ်ပြိုင်ကြသည့် မြို့နယ် ကျောင်းပေါင်းစုံ ဘောလုံးပြိုင်ပွဲ တစ်ပွဲတွင် ဖြစ်သည်။
ကစားကြသည့်ကျောင်းသားများက သူနိုင်ငါနိုင် အပြိုင်ကြဲကြယင်း အကြမ်းပတမ်းကစားခြင်းနှင့် လူလုပ်ခြင်း များ ရှိလာကြသဖြင့် ကွင်းလယ်ဒိုင်လူကြီးမှ မကြာခဏဆိုသလို သတိပေးနေရသည်။
တစ်ကြိမ်တွင် မတတ်သာတော့သည့်အဆုံး ဒိုင်လူကြီးက ဘောလုံးသမားတစ်ယောက်အား အပြစ်ဒဏ်ပေး ရန် ရှိလာသဖြင့် သူ၏ ယာဖက်ဘောင်းဘီအိတ်ထောင်ထဲမှ ကဒ်တစ်ကဒ် ထုတ်လိုက်သည်။ လာရောက်အား ပေးကြသည့် ပွဲကြည့်ပရိသတ်များ ရင်ထိပ်သွားကြရ၏။ အ၀ါကဒ်တော့ အပြခံရတော့မည်။
သို့သော် ဒိုင်လူကြီး၏လက်ထဲမှ ကဒ်သည် မျှော်လင့်ထားသည့်အတိုင်း အ၀ါရောင် မဟုတ်ပါဘဲ အနီရောင် ဖြစ်နေ၏။ တစ်ယောက်တော့ ထွက်ရမှာ သေချာပေပြီ။ ထိုအသင်းကိုအားပေးသည့် ပရိတ်သတ်များ စိတ် ပျက်သွားကြသည်။ ဒိုင်လူကြီးက အနီကဒ်ကို မပြသေးဘဲ ဘာဖြစ်မှန်းမသိ၊ ငြိမ်နေသဖြင့် အပြစ်ပေးခံရမည့် ဘောလုံးသမားနှင့် ပွဲကြည့်သူများ တွေးမရ ဖြစ်နေကြ၏။
တစ်ဖန် ဒိုင်လူကြီးက သူ၏၀ဲဖက်ဘောင်းဘီအိတ်ထောင်ထဲမှ နောက်ကဒ်တစ်ကဒ်ကို ရုတ်တရက် ထုတ် လိုက်ပြန်ရာ ပို၍ပင် နားမလည်နိုင် ဖြစ်ကြရ၏။ ဒိုင်လူကြီး၏လက်ထဲတွင် အနီကဒ်ကော အ၀ါကဒ်ပါ ရှိနေကြ ပြီ။ အားလုံး ရှုပ်ကုန်တော့သည်။ ဖြစ်ရသည့်အကြောင်းကား အ၀ါကဒ်အစား အနီကဒ်ကို မှားယွင်းထုတ်ယူမိ ၍ ဖြစ်ရလေသည်။ ပထမထွက်လာသည့် အနီကဒ်ကို ပြရလောက်အောင် ကျူးလွန်သည့်အပြစ်က မကြီးလှ။
သို့ဖြစ်ရာ ဒိုင်လူကြီးက ကဒ်(၂)ကဒ်အား သူ့လက်ဝါးပေါ်တင်လျက် သူ့အနားတွင်ရှိနေကြသည့် ဘောလုံးသ မားများအားပြကာ မယောင်မလည်ဖြင့် အရှက်ပြေ ပြောလိုက်သည်မှာ "မင်းတို့ ကောင်းကောင်းမွန်မွန် ကစားကြ။ မညစ်ကြနဲ့ မကြမ်းကြနဲ့။ မင်းတို့အားလုံး သိထားရမှာက ငါ့မှာ ဒါတွေရှိတယ်ဆိုတာပဲ"ဟူသတတ်။
ဝန်ခံချက် ။ ။ ကန့်ဘလူမြို့မှ တကယ့်အဖြစ်အပျက်ဖြစ်ပြီး ကွင်းလယ်ဒိုင်လူကြီးမှာ မူလတန်းပြဆရာတစ်ဦး ဖြစ်၏။
No comments:
Post a Comment